ජන ඇදහිලි හා විශ්වාස
බොහෝ ජන කොට්ඨාසයන්ට ඔවුනටම ආවේණික වු ඇදහිලි හා විශ්වාසයන් වේ. මෙතුලින් චාරිත්‍ර වාරිත්‍ර යන්නන් හදුන්වා දී, ඉදිරි පරම්පරාවට සේම වත්මනටද ඒකාකාර ලෙස සන්නිවේදන කිරිමට මෙමගින් හැකියාව ලැබේ. මෙමගින් සංස්කෘතිය රැක ගැනීමත් එකල සිදුවිය. බොහෝ ඇදහිලි හා විශ්වාස නිසා ගැමියා ධර්මයට නැඹුරු වන්නට විය. මේ කාලය තුළදී සිත, කය, වචනය, සංවර කරගනිමින් ඉවසීම ප්‍රගුණ කිරීමට අවශ්‍ය ඉඩකඩ සලසා දීමත් මෙමගින් සිදු විය.
සමහර විශ්වාසයන් නිසා ගැමියාගේ ජීවිතයේ සරුසාර බව වැඩි දියුණු වේ. ජන ඇදහිලි හා විශ්වාසයන් නිසා නිරායාසයෙන් වාචික මෙන්ම අවාචික ලෙස සන්නිවේදනය සිදුවන්නට විය.
යම් නිවසක සාමාජිකයෙකු හට බෝවන රෝගයක් සෑදුන විට එය අනෙකාට දැනුම් දීම සඳහා කොහොඹ කොළ, අඔ කොළ, ආදිය එල්ලීම මගින් එම නිවසේ රෝගියෙකු ඇති බව සැමදෙනාටම දැනුම් දෙයි. එමඟින් රෝගය අනෙකා හා ව්‍යාප්ත වීම නතර කරන අතර රෝගීයාටද මානසික වශයෙන් හා කායික වශයෙන් වන බලපෑම අවම කරනු ලබයි. කොහොඹ කොළ යනු විෂබීජ නාශයකයක් මෙන්ම ඖෂධයකි. එබැවින් කොහොඹ කොළ එල්ලීම මගින් රෝගයට ප්‍රතිකාරයක්ද ලැබේ.
ගැමියන් අතර වන තවත් විශ්වාසයක් වන්නේ ගැහැණු පාර්ශවය ඉර බැහැගෙන යන යාමයේ (ගොම්මන් යාමයේ) නිවසින් පිටත වැඩ කටයුතු සඳහා පිටතට නොයායුතු බවයි. එමගින් කාන්තාවකගේ ගෞරවය රැකදීමත් ඇගේ ආරක්ෂාවත් සලසා ඇත. එලෙස අඳුර වැටී යන විට එළිමහනේ සැරිසැරීම නිසා සතුන්ගෙන්, සර්පයන්ගෙන් හානි විය හැකි අතරම ජන විශ්වාසයක් වන අමනුෂ්‍ය බලපෑම්ද ඇති විය හැකි බවද විශ්වාස කරයි.
රාත්‍රී කාලයේදී නිවස අතුගා කුණු එළියට නොදමයි. එමඟින් නිවසේ සෞභාග්‍යය විනාශ වී යන බව විශ්වාස කරයි. අතීතයේ ජනයා රාත්‍රී කාලයේ ලාම්පුවක් පත්තු කරමින් අඩු එළියක කාලය ගත කරයි. එහිදි තමන්ගේ නිවසේ (කාසි, ඉදිකටු) වැනි කුඩා දේවල් තමන්ට නොදැනීම අතු ගෑවී යා හැකි බැවිනුත් ඉන් ශරීරයට හානි සිදුවන බවයි.
ප්‍රදේශයෙන් ප්‍රදේශයට ආවේණික වූ දෙවියන් අදහමින් ආගමික වතාවත්වල යෙදීමටද ගැමියන් පුරුදු වී සිටී. එමගින් කළගුණ සැලකීමත් පූජාවන් මගින් ලෙඩ රෝග සුව කර ගනිමින් තමන්ගෙ ජීවිතය සාර්ථක කර ගැනීමට ගැමියන් පුරුදු වී සිටියි. උදාහරණයක් ලෙස කොහොඔ කංකාරිය, ගම්මඩු ශාන්තිකර්මය හදුන්වා දිය හැකි අතර එමගින් සශ්‍රීකත්වය හා නීරෝගීබව අපේක්ෂා කරනු ලබයි.
රාත්‍රි කාලයේ නියපොතු කැපීම සිදු නොකළ යුතු බවද ගැමි ජන විශ්වාසයක් වේ. රාත්‍රි කාලයේ අඳුර නිසා කපා දැමුණු නියපොතු ඇනී තුවාල වීම වලකා ගැනීම එහි අරමුණයි.
මෙලෙස ගැමි ජන ඇදහිලි හා විශ්වාස නිසා එකල සමාජය ආරක්ෂා වෙමින් සංස්කෘතිය රැකෙමින් ඉදිරියට ගමන් කරන අයුරු අපට දැක ගත හැකිවේ. එම විශ්වාසයන් හා ඇදහිලි තුළවූ විද්‍යාත්මක පදනම අද වන විට නිරායාසයෙන්ම අපට තහවුරු වී හමාරය.
No comments:
Post a Comment